Шілденің 28-і күні елордамызда шағын футболдан Журналистер лигасының төртінші маусымы басталады. Бүгін осыған байланысты бірінші турдың және Журналистер кубогының жеребе тарту рәсімі өтті.
«Astana Mall» сауда-сауық кешенінің Coworking баспасөз залында өткен жеребе тарту рәсіміне барлық команда өкілдері мен Астана футбол федерациясының вице-президенті Ахмад Амиров, бас төрешісі Ғалымжан Кенжалинов және BAQ league қоғамдық қорының жетекшісі Әзиз Жұмаділ қатысты.
– Журналистер арасындағы бұл жобаны Астана футбол федерациясы толықтай қолдайды. БАҚ өкілдерінің басын біріктіріп, өзіндік тимбилдингке айналып отырған BAQ league болашақта республикалық деңгейге көтеріліп, еліміздің әр аймағында филиалдары ашылады деп үміттенеміз, – деді Ахмад Амиров.
Айта кетейік, өткен маусымның қорытындысы бойынша Журналистер біріншілігі екі лигаға бөлінген. Әрқайсысында жеті командадан. Сондай-ақ, жазғы маусымда Журналистер кубогы да қатар өтеді. Оған қос Лиганың да командаларының таласуға құқықтары бар.
28 шілде күні төртінші маусымның шымылдығы түріліп, ашылу салтанаты өтеді. Ашылу салтанатының басталуы сағат – 16:30.
BAQ league төртінші маусымының серіктестері: Астана футбол федерациясы, Қазақстан футбол федерациясы, BI Group компаниясы, «Астана» ФК, Qazsport телеарнасы, Lifefootball дүкені, All Brands дүкені, «Арасан» суы, Mammas’ Pizza пицериясы.
